حيــــــــــــــــــــاتي

بسم الله الرحمن الرحيم

ياجماعة نفسي حد يقوللي اعمل ايه بالظبط

الجواز

طبعا دي مشكلة بتواجه كل الشباب دلوقتي للعوائق المعروفةاللي مش لازم نحكيها

ونكرر فيها علشان منحبطش الناس

المهم انا عاوز اتجوز

ناس هتقولي ليه ده انت لسه صغير عيش حياتك..!؟

وناس تقولي وانت هتقدردي مسئولية ومشاكل انت مش قدها....!؟

وناس تقولي كويس بس خلص دراستك...!؟

وناس تقول وتقول...............الخ

المهم برده

انا ياجماعة عندي عدة اسباب مخلياني عاوز اتجوز

اولها طبعا موجود عند اغلبية الشباب اذا مكنش كلهم

وهو اني تعبان علي الاخر من اللي بشوفه من عري وخلاعة وبنات واللي بقيولوا عليه تظبيط

وكده يعني وحاجات انتوا اكيد فاهمينها

هتقولولي ده كلام  بيحصل عند كل الشباب ومش لوحدك وكل الناس كده وربنا يهدي

هاقول ده ميمنعش انه الواحد يفكر

والرسول عليه الصلاة والسلام قال

من استطاع منكم البائة فليتزوج

صدق رسول الله صلي الله عليه وسلم

وتسالوني ايه السبب التاني

اقولكم انه انا والدي انتقل الي رحمة الله تعالي من حوالي سنة

اسال الله العظيم رب العرش العظيم ان يجعل قبره روضة من رياض الجنة

وان يدخله فسيح جناته وان يجمعه مع النبيين والصديقين والشهداء في الفردوس الاعلي من الجنة

 بدون سابقة حساب او عذاب      اللهم امين

وانا اكبر اخواتي او بمعني ادق انا مش معايا غير اخ اصغر مني في تالتة ثانوي ربنا يكرمه ويرزقه المجموع العالي

والسنة اللي جايه هيدخل كليه ان شاء الله تعالي

وطبعا احنا مفيش كليات في مدينتنا وبالتالي هو هيتغرب زيي

وامي هتبقي لوحدها بالبيت وطبعا صعب او شبه مستحيل انه يحصل

او اني ارضي بيه

فعلي الاقل لازم اتجوز علشان المدام تقعد مع والدتي في البيت

وعمامي اقترحوا عليا الموضوع ده بسبب الموضوع ده

وكمان لسبب تاني لو حكيته هاخش في موضوع تاني مش وقته ولا لزومه

والحمد لله الشقة موجودة بس واسعة وعاوزة تل فلوس علشان تتشطب وتتجهز

والحمد لله في دخل شهري كويس يعين علي العيشة

لحد ماربنا يكرمني واشتغل

فدلوقتي عاوز فلوس علشان اشطب الشقة

وعاوز كمان اهم ما في الموضوع كله وهو........العروسة..!

اكيد بتضحك او مستغرب بس هي دي الحقيقة انا مش لاقي العروسة او بمعني ادق مدورتش عليها

فياريت تقترحوا عليا اعمل ايه في الموضوع ده ولكم جزيل الشكر

ولو في عروسة عند حد فيكم ياريت تقولولي

انا شاب كويس والله وان شاء الله هاحب مراتي حب محصلش وميتوصفش

مدام هي بنت حلال وتتقي الله فيا وفي بيتها وربنا يرزقنا ويرزق كل شاب بنت الحلال اللي تسعده وتقربه من ربنا

وادعولي بالله عليكم

ســـــــــــلام

battekh @ 00:20
Wapher | del.icio.us